Everything to Ginger Una for Manchester United vs Bournemouth

manchester-united-bournemouth

Our waka for Premier League go continue this weekend as we go dey jam Bournemouth a.k.a “The Cherries” for Old Trafford tomorrow Saturday, 04th of match by 1:30 pm 9ja time. Normal normal we go dey carry all the better tori come give una about this match on top our twitter handle @manutdinpigdin and yarnings go start by 12:30 pm 9ja time.. You fit still like our page for Facebook, our pictures for Instagram and our plenty ogbonge videos for Youtube……our handle never change na still @manutdinpigdin.

Better ogbonge congratulations to all the Manchester United fans across the world as we be win the first major trophy of the season last weekend. As we win the EFL cup, some our olotes be dey jealous us but them no know say their jealousy just start because we never even reach where we dey go. The winning mean say we don win our 41st major trophy and we don equal Liverpool wey dey form say na them get success trophy pass for England.

That final match na real high tension match as my heart just dey beat like say hin wan commot form my chest but upon all shakara wey Southampton do them still chop am 3-2. Oga Mourinho be make some mistakes for that match but the be say the boys try well especially Bros Zlatan and the koko be say na we still carry the cup go house. E sure me say oga Mourinho go don yarn the importance of this match to our guys because we never play Premier League match for two weeks and this na better chance to enter that top as we don get outstanding game plus Arsenal and Liverpool go dey jam each other this weekend.

The Cherries dey suffer wella for league and I know say Eddie Howe and hin guys go dey shake as them wan kon face us because we get better form for our side. Their last Premier League winning na for 31st December and them be 14th for table. The first leg of the fixture wey happen for their side finish 3-1 as Unites flog them for house. The people wey score for us na Juan Mata, Wayne Rooney and Zlatan Ibrahimovic.

Small Tori Tori about Dis Match

zlatan

Bros Zlatan don tear net 9 times for 2017, na only one remain for am to equal wettin full Bournemouth team don score for 2017.

For our side, Bros Jones don well and hin go dey available for the match after hin be get woundjure wey commot am from the team for one month. The only person wey fit no dey for us na Henrikh “Miki-Miki” Mkhitaryan because of hin woundjure.

For Bournemouth side, their winger Jordan Ibe never still sure for the match as hin woundjure still dey hin body. Their captain sef Simon Francis still get woundjure and no go dey for the match.

Proper Proper Match Tori

Head-to-Head

  • Manchester United don win all the former five jammings for Old Trafford, them don tear net 15 times and na only one time them open yansh-na Chris Smalling be do own towards end of last season;
  • The only two times wey Bournemouth be flog United inside 11 tryings na for 1986 FA Cup and last season for Premier League.

Manchester United

  • United need only one winning so them go become the first club wey go reach 600 Premier League victories (P949, W599, D203 L147)- olotes go dey yarn dust abeg na we be their oga jare;
  • Them never chop am inside 16 league matches since Chelsea be flog them for October (W9, D7). Na the longest unbeaten run inside Premier League this season and na the best run wey the club don get since Sir Alex Ferguson be commot for 2013;
  • Them never chop am inside 20 matches for house for all competitions (W14, D6);
  • Na only one time them don open yansh inside their seven matches for Old Trafford for 2017-the penalty wey Liverpool be score for January to draw 1-1;
  • The four former times wey United be win League Cup, them don win their next league match by 1-0;
  • Bros Wayne Rooney a.k.a Papa Kia don tear net inside hin former 2 showings for this fixture. Hin never score inside nine Premier League home matches-na hin worst run be that.

Bournemouth

  • Bournemouth fit lose five matches back-to-back for the first time since March 2013, when them be dey League One;
  • Them don collect only two points inside seven games for 2017- the worst record inside Premier League and them don open yansh 20 times;
  • Them fit no win any of their opening eight league matches inside calendar year for the first time since them be do nine-match winless for 1960;
  • Them don open yansh at least two times inside 14 of their last 17 league games;
  • Them don drop 18 points from winning positions this season inside league-na them get the highest record.

I believe say our guys go don ginger wella for this match and Oga Mourinho go make sure say them focus wella because this na better opportunity for us to enter that top four. For my own reasoning the match go finish like 3-0. You fit drop your own prediction for the comment box wey dey below or for our twitter page wey be @manutdinpidgin…..#GGMU.

 

 

Advertisements

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s