Everything To Ginger Una for Manchester United vs Everton

Manchester-United-vs-EvertonEverton go dey waka come Old Trafford today, and the match go dey happen for 8:00pm 9ja time. As una wey sabi @manutdinpigdin standa gidibam to yarn una all the tori wey join concern this match on top twitter. The tori so follow for everything wey go dey happin before the match, during the match and after the match and the yarnings go start by 7:00pm 9ja time. If this na your first time and you wan enjoy all the better tori about this match and all other matter as e join for Manchester United matter, sharply go purshue for twitter for @manutdinpigdin. You still fit go like our: page for Facebook, pictures for Instagram and even our videos for YouTube and the handle for everything na one and the same @manutdinpigdin. No forget oh na we be the number one area for all the tori wey join for Manchester United matter for our country man language…any other one na copy copy.

This match go be better melecine for the two teams as them be do better rubbish for weekend. For United side them be play another draw matter for Old Trafford wey be make efribody weak the only thing wey just save us na say Arsenal and Arsene Wenger no get better ambition if not na our 6th position we for dey again. For Everton, their own matter be worse as Liverpool be flog them 3-1 for their derby. This match na better chance to show say we wan really enter that top 4 as all the other people wey we dey purshue no go play till Wednesday and the only way e fit happen na if we win this match…..no draw soup matter.

Oga Mourinho don yarn say hin no go fashi top 4 matter until hin see say we no fit enter again mathematically and na true hin talk because if we fit win this match today so we go dey use 2 points follow Manchester City for back and them go dey jam Chelsea for Stamford Bridge on Wednesday. When we be jam for the first leg inside Goodison Park, the match end 1-1 as Bros Zlatan be tear net for us before Uncle Fellaini kon dash them penarity wey Leighton Baines be score.

Small Tori Tori about dis Match


Bros Zlatan go show for this match after hin be chop hin punishment belle full.

For our doormat, Bros Zlatan and Ander Herrera go dey after them don chop their punishment belle full. Paul “Dab” Pogba never sure for the match as Juan “Ikeji” Mata, Phil Jones and Chris Smalling no go dey at all at all as their woundjure dey serious.

For Everton doormat, their oga Ronald Koeman go get the same players wey hin be carry for their chopings on Saturday against Liverpool.

The match too quick for Morgan Schneiderlin, and Aaron Lennon. As for James McCarthy, Ramiro Funes and Seamus Coleman, their woundjure matter dey God hand as na only am sabi their matter.

Proper Proper Match Tori


  • The only chopings wey United don collect inside their former 23 home matches for league against Everton, happen for December 2013 (W18, D4);
  • Them Toffees don tear net only 5 times inside their former 12 league waka to Old Trafford and four of the eight goals na for the 4-4 draw wey happen for April 2012.

Manchester United

  • United never chop am inside 19 league matches (mtchew unbeaten wey be say na so so draw full am)- anyways this unbeaten so na the longest wey we don get since we be do 29-match unbeaten inside league from April 2010 reach February 2011;
  • This na oga Jose Mourinho longest unbeaten run inside Premier League since hin be do 40-match run with Chelsea for October 2005;
  • Them don draw 8 league matches for Old Trafford for the first time for one season since 1980-81, when na 11 them be draw (God forbid rubbish);
  • Them Red Devils don draw 0-0 for house inside 7 league matches since last season be start;
  • Na only one of the last 36 home matches them don chop flogging-na the 2-1 choping wey Manchester City be give them for September (W24, D10);
  • The last 7 goals wey United don score na 7 different players be score am for them.


  • Them never win any of their last 4 Premier League matches wey them tap away and them be collect flogging for the last two;
  • The only winning them don get from 15 attempts inside April, na against Sunderland 3 years ago (D8, L6);
  • Ronald Koeman dey find how hin go be first manager inside Premier League history to win 3 back-to-back away matches for Old Trafford;
  • Romelu Lukaku don tear net only one time inside hin former 10 Premier League matches against Manchester United-hin be score hat-trick for West Brom for May 2013 inside The Hawthorns;
  • Inside the 11 league golas wey Lukaku don score for 2017 na only one of them hin score away for their 3-2 chopings against Spurs for 5 March.

I dey reason the match as game wey we suppose win but United just dey fall people hand especially for house. So my prediction be say we go win but e no go shock me if we play another draw match. You fit drop your own prediction for the comment box wey dey below or for our twitter page wey be @manutdinpidgin…..#GGMU.



Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s