Everything to Ginger Una for Manchester United v Chelsea

Na only seven matches remain before the Premier League go finish this season and Chelsea dey use seven points gap everybody wey dey purshue dem. Anything wey go make Antonio Conte’s side carry Three points for Old Trafford, go mean say dem go dey in strong seat to carry League title. Mourinho’s men go dey aim to spoil their party as dem self, dey purshue top four and na must win match for them o. If the Reds fit knack Agberos (Chelsea), dem go keep their Champions League hopes alive.  The match go happen on Sunday April 16 by 4:00 pm (9ja time) and As una sabi, we go run live commentary ontop our official Twitter @ManUtdinPidgin handle.

Image result for manchester United v chelsea

The Super Sunday clash wey go happen for Old Trafford na the third time wey Jose Mourinho’s men and Antonio Conte’s men go face eachother this season. The first time wey dem jam, the blues knack United 4-0 for Stamford Bridge (League match). The second time wey dem jam, na FA Cup match, wey the blues win 1-0 after N’golo Kante score winning goal.

Image result for manchester united chelsea

The 4-0 win wey Chelsea win for October, na the first time wey Jose Mourinho wakka enter Stamford Bridge, since the time wey Chelsea sack am for December 2015. Aside from the fact say the Blues knack United sote dem wan shit for pant, another thing wey people remember for the match, na the mouth fight wey happen between Baba Special and Conte.

Image result for manchester united chelsea

The last time wey Manchester United knack Chelsea na in 2012, wen dem knack dem 3-2. Since then, dem don play 12 times and United don lose 7 times. From everything wey we dey observe, e be like say Jose Mourinho’s men dey ready to break that bad record with a win. E go shock everybody if the match end draw as people dey expect am to bubble.

The last 20 League matches wey Manchester United don play, nobody fit beat dem. But the thing wey no make sense about their unbeaten run, na say dem don draw 10 out of those matches (Their win percentage na 50%).

Image result for EDEN HAZARD

Danger Men (People wey fit worry)

The Agbero players wey fit worry United’s defence na Eden Hazard and Diego Costa. Hazard don score 14 PL goals, while Costa don score 17 PL goals this season.N’golo Kante self na danger man against the Reds as e don score twice against dem this season.

The Reds player wey fit worry The Blues defence na Zlatan Ibrahimovic, e don score 17 goals this season. The other United players dey struggle infront of goal for League this season. But the Reds players wey fit worry na Marcus Rashford and Henrikh Mkhitaryan.


Manchester United Team Tori

The people wey don woundjure for Jose Mourinho’s team na Phil Jones (toe), Chris Smalling (Knee), Juan Mata (groin, e fit no play till next season) and Ashley Young. David de Gea self don get minor woundjure ‘Minor hip wound’ and we no sabi whether e go dey fit in time for the match on Sunday.

Chelsea Team Tori

Victor Moses don recover from the wound wey e get, as e bin play for Chelsea against Bournemouth last week. E mean say Antonio Conte get all hin players fit. We dey reason say na Nemanja Matic go partner N’Golo Kante for midfield.

Image result for manchester united chelsea

Our Prediction

We know say the match go tough ehn, but we dey predict say Manchester United go knack Chelsea 2-1. Wetin be your own prediction? You fit drop am for our comment section below.

One thought on “Everything to Ginger Una for Manchester United v Chelsea

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s