Everything To Ginger Una for Burnley vs Manchester United


Manchester United go dey jam Burnley next tomorrow for Turf Moor and the time of the match na 2:15 pm for 9ja time. Make I no dull una but una sabi say we for @manutdinpidgin go dey give una all the plenty tori of the match before the match start, as the match dey happin and when the match finish for our twitter page. Our build-up of the match go start by 1:15 pm 9ja time and we get one correct madam- Princess Tosynbucknor wey go dey follow us yarn. So if you no fit watch the match, we standa gidi gbam here for you. All you gatz do na to purshue us for twitter @manutdinpidgin for the match tori as e dey hot and you fit still like our picture for Instagram, our videos for Youtube and our Facebook page as the matter dey hot…… our handle never change na still @manutdinpidgin.

As we don use ginger enter semi-final of Europa League we don make sure say one door dey open for us to enter Uefa Champions League next season. That game get as e be as the winning carry plenty wahala with am but the koko be say we don enter semi-final. This match carry hin own importance because as we don flog Chelsea last week we gats continue for that format to commot Manchester City for 4th position.

Small Tori Tori about dis Match

Burnley vs United

For Burnley doormat, e never sure if their striker Sam Vokes fit no dey the match as them still wan check am wella. Scott Arfield sef never sure to dey the match but Johann Berg Gudmundsson no go dey because of woundjure wey hin be get.

For our own doormat, Marcos Rojo and Zlatan Ibrahimovic no go dey this match as their season don end because of woundjure wey them carry for our last game inside Europa League when we jam Anderlecht.

Phil Jones, Chris Smalling and Juan Mata sef no go dey the match as them woundjure never commot but Ander Herrera and Ashley Young suppose dey our starting eleven after them be rest them for Europa League.

Proper Proper Match Tori


  • Manchester United don tear net only one time inside the last four league jammings wey happen for Turf Moor and na Lou Macari be tear net for us for April 1976;
  • That winning na one inside two winnings wey Manchester united don get inside the last 12 league waka to Burnley house (D5, L5);
  • The first jamming for Old Trafford this season for October finish 0-0, this one mean say Burnley fit chop unbeaten both home and away for Manchester United hand inside one season for the first time since 1973-74.


  • The Clarets don win only one inside the former former 10 league matches (D4, L5), after them be win the former five inside 10;
  • But them follow get one of the best record for house as them don collect 19 points inside 24 wey them fit collect for Turf Moor (W6, D1, L1);
  • Their record of 32 points from 16 matches for their house na the best of any team wey get promotion enter Premier League since Charlton Athletic be do am for 2000-01;
  • Sean Dyche side don already carry pass the total points wey them be carry the two former times them be dey Premier League;
  • Tom Heaton wey be their goalkeeper be make 11 saves for the first leg wey happen for Old Trafford-na hin joint most savings inside Premier League game this season.

Manchester United

  • The Red Devils never chop flogging inside 22 games for Premier League-na the longest unbeaten run inside one season wey any team don get since United by themselves be do 24-unbeaten for 2010-11;
  • Na only one draw remain for them to equal the longest draw record (13) wey them be get inside Premier League for 1998-99;
  • Na them get the best away points per game average for inside league. Chelsea and City don collect point pass them but the two of them don play 3 away games pass United;
  • United fit tear net with three goals or more inside four back-to-back Premier League away games for the first time inside 17 years;
  • Zlatan don tear net inside seven of hin last eight league away showings, expect for the 1-1 draw wey happen when we jam Stoke for 21st January;
  • Rashford fit tear net inside back-to-back Premier League showings for the first time.

The match go wan hard small because of how strong Burnley dey for their house but I dey predict say we go win by at least 1-2. You fit drop your own prediction for the comment box wey dey below or for our twitter page…….#GGMU.






Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s