Na another soji day for Manchester United as the tactical Master ‘Baba Special’ don show again say hin be Oga Pata Pata. Upon say the squad dey reduce because many players dey wound, e still dey pick up three points. The Red Devils knack Burnley 2-0 for their own house o. The knacking badt sote dem no fit get shot on target. The person wey score the first goal na Anthony Martial after e do mad counter with Ander Herrera. Then Wayne Rooney con double am. As things be, the Reds dey on 63 points (dem dey 3 points behind Liverpool and 1 points behind Manchester City).
We sharply wan talk about the five things wey we observe for the match:
The first thing wey we observe na say Manchester United bin play strictly according to Jose Mourinho’s instructions, and dem do am well. The job wey Ander Herrera do against Chelsea, na Maroune Fellaini do am today. E no allow make Barton rest. E worry am sote the guy no fit throw pass to hin strikers. The number of Ariel balls wey Fellaini win for this match plenty self, as Mourinho sabi say Burnley too like dey cross.
The second thing wey we observe na say Anthony Martial don prove himself small, for Jose Mourinho eye but e still get plenty work to do, if e wan win over Jose’s heart. Na Tony wey strike today onto say Zlatan Ibrahimovic don woundjure and Baba Special bin wan rest Rashford for the Manchester Derby. Na Martial wey score the first goal after e do fast counter with the ball wey Rooney give am. Herrera con epp am with one solid return pass and e take bury Burnley. Apart from the goal wey e score, hin movements bin dey sharp as e worry their defenders but we believe say e fit still do more in the coming games, to cement hin place for Mourinho’s mind.
Another thing wey we observe na say our defence strong gan this season. Na the same thing wey happen against Chelsea, wey happen again Burnley today. Dem try, but dem no fit see shot on target. Na Daley Blind and Eric Bailly wey play centre-backs for the Reds. Blind bin try for first half, but e do one costly mistake for second half. God save am say Burnley no use am score. Eric Bailly on the other hand, na power house, Minister of Defence. No Burnley player fit beat am for second half. E frustrate all of them. E sweet me as dem take keep clean sheet today.
Another thing wey we observe na say the plenty fixtures wey Manchester United get, don dey affect their players, and e dey increase the rate at which people dey woundjure. Na on Thursday, wey Rojo and Zlatan wound against Anderlecht. Now Pogba bin commot the match, after e be like say wound happen to am. Also, before the match finish, Eric Bailly bin dey for floor, but later e con standa. We dey hope say dem no woundjure because we no fit afford another set of injuries.
The last thing wey we observe na say our midfield combo of Ander Herrera, Maroune Fellaini and Paul Pogba make brain today. Na why the Reds bin dominate for the most part of the game. Na only few times wey Burnley fit put ball together, enter our area. In short, everybody try today. We just dey pray make United continue like this, so dem go fit finish Top Four, incase dem no fit lift Europa League title.