Today na the first day wey Manchester United go thank God for one point in Premier League this season, onto say e remain small Manchester City for finish them. This match get as e be, when Line up commot, i think say e go be real war as i see say Henrikh Mkhitaryan, Marcus Rashford and Anthony Martial dey start. But as Ref con blow whistle, i realise say our players no come attack today. The match con dey worse as Fellaini collect red card after e go head butt Sergio Aguero. Gabriel Jesus tear net self but the linesman talk say na offside.
We wan sharply talk about the five things wey we observe for the match:
The first thing wey we observe na say Maroune Fellaini na moron. Inshort na total moron. Nobody today wey e don dey put himself ahead of the Club’s personal interest. If say e get us and our Champions League dream for mind, e no go head butt Aguero. The truth na say plenty of our players like Darmian, Henrikh Mkhitaryan and Anthony Martial play rubbish today but the stupidity wey Fellaini do, don overdadow their poor display.
The second thing wey we observe na say Eric Bailly fit defend the Earth from Alien Invasion. The number of balls wey the Ivorian clear from our defence plenty ehn. If no be for am, Manchester City for don win this match. I no wan take anything from the defensive team as a whole, ontop say players like Blind, Valencia and ko try sha but Bailly outshine all of them.
The third thing wey we observe na say we no too understand the kind game wey Manchester United bin wan play tonight. From wetin we see, na so so Fling ball go front to Rashford and hope for the best. For the most part of the game, e bin dey isolated for front as na three City defenders mark am. Mkhitaryan and Martial wey suppose dey epp am for attack, bin dey perform defensive duties.
Another thing wey observe na say our midfield bin miss paul Pogba tonight. No form of creativity bin show for our midfield tonight. Ander Herrera’s hands bin dey full as e dey mark people up and down, Carrick na old age dey worry am but e epp to guide our defenders sha, as for Fellaini, e no get any form of creativity, e no fit play ‘through pass’, na only side pass e sabi. Our three attackers, no see any form of link up with our midfielders.
The last thing wey we observe na say Manchester City bin play United half field for second-half. Jose Mourinho’s men bin try for first-half as dem try attack small, na why dey see some chances but dem play total rubbish after half time. Dem no even see any goal scoring chance and the matter con worse after the red card. As the ref bin blow final whistle, na so so relief full the faces of Manchester United supporters because dem know say we no play anything.