United dey waka go Emirates Stadium as we dey jam Arsenal for the next Premier League match wey we go play. The match dey happen today Sunday 07th of May 2017 and the time na 4:00 pm for 9ja time. You fit to follow all the match yarnings ontop our twitter page @manutdinpidgin so make you sharply go purshue us for twitter so you go fit enjoy all the tori wey join for the match. The match yarnings go start 3:00 pm 9ja time and we get one correct confirm oga wey go dey follow us yarn and hin twitter handle na @kennagq. No be only dis match matter we dey yarn oh as na we be the number one correct confirm area for all ogbonge tori as e join for our darling club Manchester United matter. So if you don dey slack before, no slack again and you fit still like our page for Facebook, our pictures for Instagram and our plenty ogbonge videos for Youtube……our handle never change na still @manutdinpigdin and na we fit dey sama you with all the better better tori wey join for Manchester United matter for our country man language.
Yes oh another match don come again and this na the fifth match wey them go dey play inside two weeks. The match dey happen 66 hours after we be jam Celta Vigo for Spain inside Europa League. Thank God say we be win that Thursday match as Rashford be tear net for us and that one mean say our unbeaten run inside all competitions na 12 and we never chop flogging inside Premier League since October even though say na so so draw we pack full there. Our defence for league be make brain as we don open yansh only 25 times (na we get the 2nd best defence for league) but that draw wey we follow Swansea play last week for Old Trafford mean say our top four tori no too dey sure like that.
Arsenal a.k.a “Bayern Pikin” be collect flogging for Tottenham hand last week and na their fifth choppings inside their former six away league matches be that. That flogging mean say them gats win the match tomorrow if them wan get hope to collect their regular “top four” title. The first jamming of the season inside league for Old Trafford end for draw as Mata be tear net for us before Giroud kon head ball for enter net for them as the match wan end.
Small Tori Tori about Dis Match
For Arsenal doormat, Granit Xhaka get woundjure for their last match wey them chop flogging and hin get “shipini chance” to tap ball as per wettin Arsene Wenger be talk. Shkodran Mustafi and David Ospina don start to dey train after all the woundjure wey them be get.
For our own doormat, Ashley Young no go dey the match after hin be carry woundjure for the match wey we play for Thursday inside Europa League against Celta Vigo. Marouane Fellaini a.k.a “oga afro” never finish hin punishment so hin no go dey and them bros Marcos Rojo and Zlatan Ibrahimovic plus Luke Shaw and Timothy Fosu-Mensah no go dey because of woundjure.
E dey very possible say oga Mourinho go allow Marcus Rashford a.k.a “Rashidi” go rest after hin be play that our Thursday match for Spain with woundjure.
Proper Proper Match Tori
- Manchester United be chop flogging (3-0) for this match last season but na the only flogging wey them don collect inside 11 league jammings (W6, W4);
- This na the 50th Premier League jamming wey go happen between the two clubs. Arsenal don win 12 and United get 22, with 15 draws.
- Them don already chop flogging inside six league games for 2017, this na the total floggings them chop inside 2016;
- Them Gunners (but their gun no dey shoot anything) don chop flogging inside only one of the former 15 Premier League matches wey them play for house (W11, D3)-the flogging so na against Watford for 31st January;
- The last time wey Arsenal and Manchester United be finish for top four na for 1978-79. That season Arsenal be finish for seventh and United be finish for ninth;
- Arsene Wenger don collect only one winning inside 16 former jammings against oga Jose Mourinho-that winning na for 2015 Community Shield (D7, L8);
- This one go be Wenger 58th jamming against Manchester United as oga of Arsenal-na them be the opponent hin don jam pass for inside hin career as oga for football (I talk am say them no reach);
- Alexis Sanchez dey find two goals to enter 50 Premier League goals for Arsenal (he go still find am go front).
- Them Red Devils never chop flogging inside 25 matches for Premier League-this one na club record inside one single season but we don draw draw 12 of the matches (the unbeaten na wah as e no just make sense again);
- Them join for three clubs wey don collect Premier League points pass away from home than for home this season-na Manchester City and Crystal Palace complete the list (this one na before this set of matches);
- Them don draw draw 14 games this season-na the highest number for league be that. If them be draw this match so, e go be the highest number of draws wey them go get for one season since them be get 15 for 1991-92 when league be 42 games;
- Them don win the last four Premier League games wey them be play after them come back from Europa League game;
- Oga Mourinho never chop flogging inside Premier League match for Arsenal hand inside hin former 12 jammings (W5, D7)-(our oga still get record for their head);
- Bros Wayne Rooney a.k.a “Papa Kia” don tear net 11 times inside Premier League against Arsenal-this one pass any other player-and hin don tear net 14 times inside 33 league and cup matches versus the Gunners.
Oga Mourinho don yarn say hin go rest plenty players because our next match na Thursday and na important match but as e be say na arsenal we wan jam I believe say patapata na draw go end am we no fit collect. You fit drop your own prediction for the comment box wey dey below or for our twitter page wey be @manutdinpidgin…..#GGMU.