Tonight na good night for the Red Devils as Manchester United don wakka enter Europa League final after dem draw 1-1 against Celta Vigo for Old Trafford. The Reds dey wakka enter final onto say dem knack the Spanish side 1-0 for Spain. The aggregate scoreline na 2-1. The person wey score for the Reds tonight na Maroune Fellani, with hin head, after Marcus Rashford cross for am. The Europa League final go happen against Ajax on Wednesday 24th, May, 2017 and we dey hope say Jose Mourinho’s men go win, so dem go grab free ticket to UEFA Champions League next season.
We wan talk about the five things wey we observe for the match against Celta Vigo.
The first thing wey we observe na say Manchester United play complete rubbish against Celta Vigo. Na God save Jose Mourinho say Celta Vigo no convert their last chance for the 95th minute, else ehn e for bad gan. The truth be say na Celta Vigo play pass tonight. Dem get attempts pass United onto say na defend wey Jose Mourinho tell him team to do. The Reds bin play very deep, and e con allow make Celta Vigo see many chances.
The second thing wey we observe na say tonight be the first time wey Eric Bailly don lose hin temper in Manchester United jersey. We feel say that Celta vigo player bin don abuse Bailly unto racial abuse for am to react with dat “don’t come to the mainland” behaviour. Na God save the guy say Eric Bailly no commot hin teeth, because if say dem leave dem to fight. Baba Blue for don beat blood commot for the guy mouth. Now wey the Ivorian don collect Red Card, e mean say e go miss the Final.
Another thing wey we observe na say Manchester United dey very bad on counter attack. The Goal wey United bin score self, no be counter self but na against the run of play because Celta bin dey worry dem. The truth na say, all the counter attempts wey United try tonight fail. We no sabi whether na the players no fit play am, or na the kind tactics wey Jose Mourinho dey use. We just dey hope say the team go improve on the day of the final.
Another thing wey we observe na say Celta Vigo attackers need glasses. Na dem see attempts pass for the match, but na so so rubbish shots dem just dey play. Before the match, John Guidetti dey make mouth say E go make sure say Manchester na Blue.. But na him wey miss open net for the 95th minute, wey for send Celta Vigo to the Final (If say e score am).
The last thing wey we observe na say Jose Mourinho gots work on hin tactics because no be everytime wey United suppose dey play defensive game.. How person go dey play defensive game against small team like Celta Vigo? Then, wetin we go con do if we qualify and we dey face Barcelona? E shock me say United bin play very deep today and e no epp them at all. The Reds manager gots bring back ‘attack attack attack’ to The Theatre of Dreams.