Manchester United don continue with their okro soup chronicles as usual as dem wakka enter St. Mary’s Stadium to draw 0-0 against Southampton. We know say their excuse go be say their mind dey Europa League final, but the koko be say you no fit use bend down select players achieve greatness.. Na why we don balance yansh wella for sixth position.
We wan sharply talk about the five things wey we observe for the United match against the Saints:
The first thing wey we observe na say Manchester United no sabi play good football. Upon say nothing dey at stake again, the team no fit give their fans quality attacking football because e no dey their body. Counter na Zero, Fast-attack na zero. The only thing wey dem fit do na to create chance once in a blue moon. This team without Zlatan and Pogba, na below average.
The second thing wey we observe na say Sergio Romero don make serious statement, say e dey ready to start against Ajax in the Europa League final. The number of mad saves wey e make last night against Saints yakpa. E sure me say na him win Man of the Match. The guy even save penarity wey Eric Bailly cause.
Another thing wey we observe na say Maroune Fellaini and Juan Mata don woundjure. Na why Jose Mourinho commot them. Rashford bin enter for Mata, while Herrera enter for Fellaini. We dey hear say Mata own na knock, and Fellaini own na hamstring but we never sure yet. Before dem woundjure, dem no play anything sha. Juan Mata self never impress me since the time wey e come back from injury, na below average e just dey play. Fellaini na still Fellaini, E sabi win tackles and headers but e no dey creative if ball dey hin leg.
Another thing wey we observe na say Manchester United bin suffer from lack of quality from Eric Bailly (Right-back) and Matteo Darmian (Left-Back). Everybody don sabi Darmian own, say the guy sabi defend but attack-wise na zero. The guy no fit push attack to save hin life and as e no sabi run, e no dey do pass himself. Eric Bailly on the other hand, go run, do agidi like say e wan do better pull out… But as right-back no be hin natural position, na yama yama crosses (pull out) wey e just dey make, or sometimes ball wey e suppose cross, e go pass back.
The last thing wey we observe na say Jose Mourinho dey get serious headache ontop who e go use for United’s defence to partner Daley Blind in the Europa League final against Ajax. The decision na between Phil Jones and Chris Smalling. Dem two na calamity but we dey reason say e go pick Phil Jones because Ajax get fast attackers.