Manchester United bin play their last match against Crystal Palace for Old Trafford on Sunday, and na 2-0 wey the match finish. The people wey score for United na Josh Harrop and Paul Pogba. Now wey Premier League don end, and Jose Mourinho’s men finish 6th for table, everybody don turn their attention to Europa League final wey go happen on Wednesday night.
We wan sharply talk about the five things wey we observe for the last game of the PL season:
The first thing wey we observe na say our young players don ripe for first team football. All the young players wey tap ball yesterday impress me. The person wey ball pass among dem na Josh Harrop, na why e win Man Of the Match.
The second thing wey we observe na say Wayne Rooney still get am for body. As dem pair am up with small pikins wey sabi, e show small signs say him na still world class player. The way i dey look am so, e fit play ball for Manchester United for one or two more seasons.
Another thing wey we observe na say the match wey we get on Wednesday night na must win. But if even we no win, We get team wey got fit do well next season. As our small pikins don dey ripe.
Another thing wey we observe na say Paul Pogba dey miss better partnership. The French man go dey score more goals if United fit buy another midfielder, wey go gel well with am. The way hin take play yesterday make brain, e tear net self.
The last thing wey we observe na say Mourinho sabi wetin dey best for the club. E dey work with the kind players wey hin get. We sabi say this season dey very poor because the expectation wey we set for am dey very high. We dey hope say e go do more next season.