Today na good day for Manchester United fans onto say the Reds knack Ajax 2-0 for Europa League final. The person wey score United’s first goal na Paul Pogba after Sanchez deflect hin shot enter net, Then Henrikh Mkhitaryan con double am for second half. As everything take be, the Red Devils don qualify for the UEFA Champions League group stage. So all the people wey bin dey yab dem, say dem finish 6th, don swallow their words as the Reds season better pass Tottenham, Liverpool, Arsenal & Manchester City.
We wan sharply talk about the five things wey we observe for the match:
The first thing wey we observe for the match na say Manchester United bin play strictly according to the tactics wey Jose Mourinho give dem. The Reds bin set up in a defensive manner and na counter attack wey dem use worry Ajax. Upon say Ajax get ball possession pass United, dem no fit see better chance to test Sergio Romero as all the defenders put body for ground, play better ball. Upon the defensive tactics, The Reds still manage tear Ajax’s yansh twice.
The second thing wey we observe na say the midfield wey Jose Mourinho use against Ajax try gan. Maroune Fellaini bin put up one of hin best United performances last night. Ander Herrera bin win Man of the Match because e ball fire, and e behave like captain sef. Then Paul Pogba na the person wey score our first goal, and e epp ginger for attack too.
Another thing wey we observe na say Jose Mourinho don prove this season, say him na truly the Special One. Before hin wakka enter United, many people bin tell am say e no go succeed, say e no go qualify for Champions League, say hin pattern slow and e dry. But as Baba Special don carry three trophies (Community Shield, EFL Cup and Europa League), e don prove say e still get am for body.
Another thing wey we observe na say the Reds go fit attract big players at cheaper price, now wey dem don qualify for Champions League. Some of the players wey dey linked to United na Neymar, James Rodriguez, Griezmann, etc. E sure me say dem go like wakka enter Old Trafford now wey UCL football dey sure.
The last thing wey we observe na say some Manchester United fans go like make Zlatan Ibrahimovic remain for another season. They wan make e stay sote dem go do banner say ‘If Zlatan stay ehn, dem go allow am to shag their wives.’ Whether the Big man go gree stay dey yet to be decided, na during summer we go know.