Manchester United dey chook eye for two new strikers as Zlatan Ibrahimovic fit no return to Old Trafford again, na wetin reports dey say.
The Daily Mail dey claim say, the main people wey Jose Mourinho dey focus on na Real Madrid star Alvaro Morata and Everton yansh tearer Romelu Lukaku.
Dem two, don work under the United manager before, and now wey Ibrahimovic’s agent Mino Raiola don admit say hin client fit no stay for Old Trafford, Baba Special go like make one of dem, come play for am.
Ibrahimovic go turn 36 next season and we dey doubt if e go dey fit before January onto say the woundjure wey e get last season serious.
But yesterday, e bin post fitness video on Instagram, where e bin dey kick ball for the first time since hin ACL wound.
Zlatan bin dey jog on the spot and hin fitness coach bin dey throw ball for am and e dey kick am. The caption wey e use na: “The touch wey i get no fit vanish. Person wey be Lion, no fit recover like human being.”
Fashi say Zlatan don dey improve, no confirm date don dey ontop when e go return and the thing dey worry Jose Mourinho, na why e wan dive inside transfer market to find replacement. Everton talk say make we bring £100m for Lukaku, while Real Madrid dey ask for £65m for Morata.