Now wey Manchester United don gree with Benefica ontop how much dem wan pay for central defender Victor Lindelof, we wan sharply analyze the 22-year-old and wetin e fit bring to the table.
The reports wey we hear from Sky Sports News HQ na say United go pay the Portuguese club £30.7m, so that the Sweden international fit wakka enter Manchester.
Jose Mourinho bin plan say e go sign centre back after the season finish. The players wey dey hin mind na the Lindelof wey we just sign, Michael Keane and Virgil van Dijk. The thing wey make am choose Lindelof over dem, na say e dey more rigid pass them. We dey wait to see the kind solid partnership wey Victor Lindelof and Eric Bailly go get next season.
No be today wey United don dey chook eye for Lindelof, dem bin wan sign am for January as many of their defenders (Smalling, Jones, etc) bin woundjure but dey con fashi am.
The 22-year-old bin wakka enter Benefica from Swedish side Vasteras SK in 2011 and e don play 73 times for the first-team, and e don epp dem carry Portuguese league title on three occasions.
Lindelof don also tap ball for hin country Sweden, as e dey among the people wey epp them carry U21 European Championship in 2015, and e also play for their senior team at Euro 2016.