As Lindelof don wakka enter Old Trafford, e mean say Jose Mourinho go get five centre backs wey e fit choose from – unless e gree say e go sell one.
Eric Bailly, Marcos Rojo, Chris Smalling and Phil Jones go dey fight for their places.
But Jones talk say e no dey worried.
This na wetin Phil Jones yarn:
“Na we be Manchester United, we go attract the best players wey dey this world, players wey carry weight.”
“Our summer go dey strange if we no sign players wey carry weight. Competition na good thing na, always.”
“I don follow the manager word. E dey ask me how i dey feel, how i dey – Na just normal talk wey player and manager fit get.”
“Him na manager wey sabi manage hin players well, na like that e take dey relate with all the players.”