Eric Cantona don commot blast Antonio Conte, say the guy no get common sense, say the way the Chelsea manager take send text message to Diego Costa no make brain at all. If e wan discharge am, e for summon am, clear am, no be to dey send message like as if say dem dey date and e wan break up.
Conte bin inform the Chelsea striker by text say e no need am again, say e no dey part of hin plans for the new season at Stamford Bridge.
The Manchester United legend believe say Chelsea go feel the impact of wetin Conte do, for their bank account.
“Say person dey text when e dey angry no good at all, but the one wey worse pass na when person dey break up via text,” Cantona dey yarn.
“If you mix the two together, na the kind message rubbish wey Conte send,” Cantona still dey yarn.
“E tell Costa say e no want am again, say e no dey hin plan for next year. Every single letter wey e type for that message go cost Chelsea about one million Euro. Person wey get sense no suppose dey run hin team with hin fingers.”
The club officials self dey vess for Conte because dem no like how e take send that kind message, as dem dey reason whether dem go sack the Italian wey lead agberos to carry Premier League title last year.