Jose Mourinho don yarn Manchester United say e go prefer am if dem sign Cristiano Ronaldo, than make dem sign any other striker, na the reports wey we dey hear.
The 32-year-old don inform Real Madrid say e wan wakka commot this summer and e don command hin agent Jorge Mendes, say make e find new club for am.
The Sunday Times dey claim say United dey reason whether dem go buy their former player, Times also talk say Jose Mourinho don give hin club officials the green light to go ahead.
Madrid dey try beg Ronaldo, to see if e go change hin mind and dem go only sell am if e refuse and insist say e wan commot.
United don dey follow Madrid yarn this week onto say dem wan sign Alvaro Morata, but dem two never gree ontop money matter.
United bin table £52.4m for the striker, but Madrid reject am onto say dey wan make the Reds carry £79m, say dem no dey desperate to sell am.
Wetin we understand na say Morata wan wakka enter United and e don dey call Mourinho for phone, say e dey sweet am say e go soon enter Old Trafford.
Meanwhile, Ronaldo dey vess say Spanish govt fit accuse am of tax fraud, na why e wan commot Los Blancos. The Spanish prosecutrs talk say e dey owe €14.7 million (£13m) in tax, and e dey dodge so e no go pay am. Ronaldo don deny everything.