Sir Alex Ferguson don yarn ManUtd dem current crop of players say make them begin ‘accept challenge to knack all them other big teams akpako up and down by next season’ as this coming season go be the make or break season for Baba Special One.
United manager Mourinho don dey charged to be ogbonge title contender for him second season for Old Trafford as the board dey expect make him Sef make correct brain for this coming Champions League season.
United preparations for this tear rubber campaign go include badass pre-season waka wey them go use face Real Madrid two times before them go come meet our bad belle cousins Man City, Barcelona and other US clubs as part of the International Champions Cup tournament.
Baba Special One don reason am say hin go fit measure him team full potentials by the time him team don face all these clubs before EPL new season start.
ManUtd go jam Champions League Winners Real Madrid for the second time as two both of them go fight for European Super Cup for August 8.
Mourinho dey target to become the next manager since Ferguson to deliver EPL title by hook or by crook after him don win EFL cup and Europa League for this him debut campaign.
Sir Alex dey reason say the pre-season test go epp the team to get mouth to fight for this new season title.
Sir Alex talk tell journalists say “The thing about United wey dey make my bele nyafu nyafu Na say we no dey fear to challenge anybody wey think say Na him head wey big pass for league”. “The road to salvation dey tough sha, but we dey always expect say we go always pull through”.
” E dey very good for the smallies wey dey come up from the academy team to enter this kain competition so that their mind go strong wella to knack the ManUtd badge for them chest as player”.
“And the only way Dem go fit prepare themsef for big games Na for pre-season matches like for International Champions Cup wey dey make plenty brain”.
We dey hope say Baba Special One go dey lead this him team to success sha. And we dey wish the smallies good luck for this campaign. We dey tell dem say make them no fear as our people dey talk say “Small Body no be Sickness”.