ManUtd target Alvaro Morata dun marry Alice Campello before Old Trafford move

Alvaro Morata dun marry him yori yori Alice Campello for Venice as him dey prepare for him mega cash waka to ManUtd.

The 24 year old bin pop question give the Italian model and tailor for one wuru wuru show like that for Madrid for December wey just pass. Na him as bad guy wey him be, him no waste time come marry am shapally for her village six months later.

Him Personal people wey show for the Owambe wey take place for Basilica del Redentore Na people like Real Madrid team-mate Isco and Simone Zaza wey been tap ball with am for Juventus.

As things dey be now, Bros Mora go soon confam to be Baba Special one second signing for the season as we don use £30.7m clamp down Vic-O last week.

ManutdinPidgin dey see say ManUtd no be only club wey dey chook eye for Morata matter with Agberos wey dey pose serious threat to claim am. But the homeboys levels wey him and Mourinho get dey swing for ManUtd Favour small sha.

Baba Special One Na the main actor wey give Bros Mora him first team debut for Santiago Bernabeu for 2010 and now him dun make am him number one transfer target after Papa Ibro tear him leg come wounjure for April.

Image result for morata wedding

United bin make approach for Morata last month but e bin still dey very early as that time Real Madrid been still dey plan how to knack Juventus akpako for UCL finals.

Bros Mora, wey dun win two champions league medals been wan confam whether ManUtd go show back for Champions League after one year absence before him join as per Wetin olofofo people dey yarn.

But from wetin ManutdinPidgin dey hear, them say ManUtd, Real Madrid and Bros Mora agents just dey look themsef like Lookman and Na only for First week of June after Real Madrid knack Juventus akpako 4-1 wey ManUtd eye come clear. Na him dem com dey Rush the guy since then.

The chance to become ManUtd main striker next season dey sweet Morata Belle wella because the guy dun struggle for Madrid and Juventus to start matches. But that time, maybe him coaches bin feel say him hustle no pure that time sha.

Chelsea wan table £70m to sign Alvaro Morata, Agberos wan sly Manchester United

As him just knack 20 goals for previous season, e dey wan be like say Bros Mora go be the most expensive Spanish footballer of all time – six years after Fernando Torres £50m waka enter Agbero club.

We for ManutdinPidgin sha dey wish Bros Mora and him yori yori happy married life. Make them package our cake sha wen them enter Old Trafford or else yawa go gas.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s