Midfielder Ander Herrera don become one of game most comfam ballers since wey him waka enter ManUtd from Athletic Bilbao for June 2014, we say make we epp una know how far the Spaniard hustle don be before only am waka come Old Trafford.
Dem born Herrera for Bilbao for 14th August 1989 (This guy na smallie sha) but him learn how to tap ball for Real Zaragoza where him ball for 41 times for first team and him come even epp them win promotion to enter La Liga for 2009. Two years later, na so him hustle come carry am enter him village football club Athletic Bilbao and na £6.6million dem buy am.
As Bilbao come be ogbonge football power-horse for Europe, Herrera come be one of the key players for the club under them coach Marcelo Bielsa. Athletic Bibao come enter 2nd place for Europa League and Copa del Rey.
Hynia injury come cause gbege for him career around 2012/13 campaign and him team mates come begin dey find greener pastures for other big clubs. As him show back enter him team from wounjure ehn, na him e come epp him team commot from relegation zone.
For March 2012, ManUtd and Athletic Bilbao come jam for Europa League wey everybody dey expect say Na walkover say Reds go win. As e come be, Bilbao off ManUtd pant as them knack us 3-2 like small pikin. For that match, Herrera bin tap serious ball ehn but him come play for 86 minutes after him don provide one assist for de Marcos to score.
Like joke, like joke oh, for second leg, Bilbao come off ManUtd pant again for Spain wey make Reds commot from that competition (e no matter again sha as we don win the cup now!).
Herrera dun play for Spain under 21s alongside De Gea and Juan Ikeji. Him also show for Spain Olympic side during 2012 games for England. After him don display better ball sense for Olympic, Na so big big clubs for Europe come dey chase am.
Ten months after olofofo journalists dun spread rumors say him go join United, Herrera come finally sign for ManUtd for four year deal. Upon him signing, Na so papa Giggs yarn say: “Ander Na ogbonge player o and he get mouth for Europe because of him Energy and Skills on the mike. I don reason am say him go shine for Spain and ManUtd fans go like am wella as him go be mega hit for Old Trafford”.
As if Giggs been know Sef….
Herrera Na intelligent player wey dey speak correct English. And one day, we dey hope say e go be our captain….Roy Keane style.