Wetin be the way forward for Anthony Martial?

Anthony-Martial

Time fit dey run out for Anthony Martial.

 

These days ehn, smallie dem wey dey knock ball wela don yapkayaski for France wey be say many French ballers so don dey even follow us dey watch France team matches instead make dem dey play. The plenty ballers wey dey run pass thief wey France don produce recently, football never see am before.

One of the players wey dey follow us watch France games for like ten months now nain be the fourth most expensive Manchester United signing. Na bros Tony, Anthony Martial.

Martial wey be say dey worry for side line before, now him just dey worried for sidelines. Player wey be say as hin show, critics been dey feel say the money wey dem drop for hin head go heavy am, make am no fit ball. Hin enter field, use ball tell many people “shut up”, even come become Manchester United lead scorer for that hin debut season.

At that stage, everybody eye clear, even doubters con dey put hope on hin head for the next season, say as hin don come settle wela for England plus hin don even partake for hin first Man Utd pre-season, say even Mourinho wey no been too dey like use smallie dem, no go fit ignore am.

Sand sand come enter drinking garri as Martial first get gbege, come even split with him wifey and the mama of hin pikin wey be Samantha. Dead body come even get double wahala as hin come begin dey feel homesick, still come dey pick up some kain injury. No be say any of this thing dem big like that but dem come affect the player confidence wey be say even when dem put am for match, hin no dey worry for wing again, dey play like who no like ball again.

Manchester United go still kolobi Fabinho?

Another wahala come be say, na even Van Gaal wey sign am. As una go reason am so, out of the 5 outfield players wey Van Gaal dey ManUtd buy, wey be Memphis Depay, Matteo Darmian, Morgan SChneiderlin< Bastian Schweinsteiger and Anthony Martial hinself, three don comot Man Utd and the ones wey remain no even too dey see playing time.

Martial sef no come be the kind baller Mourinho dey like as the coach dey like wide attackers wey still dey sabi track back and wey get ginger for field based on work rate. The coach don praise young Rash, Marcus Rashford, wela as hin dey enjoy the smallie ball.

Many fans wey love Martial wela dey put hope say hin go step up this season as even blind man wey be Cricket fan know say if Martial hit form, some kind defenders go dey reason retire. The only problem now na say, even if him ginger well, this one wey be say Man Utd wan sign central striker and even wan sign Ivan Perisic for the left flank, how e go be?

Tori wey dey ground be say Martial no dey for sale but one reporter wey be Miguel Delaney dey reason say if Man Utd last last kolobi Perisic, then the tori go change.

Manchester United dey reason kolobi another Benefica star ‘Nelson Semedo’

How Martial wan take do am pass now? Shey hin fit turn hin fortunes around for Man Utd? Shey woman matter go stop dey trouble am? Martial fit sit up begin work hard now for hin redemption but for the European Football Golden Boy of 2015, that redemption waka long well well if you reason the one wey hin go use waka comot United. E dey left to the player now. If him fit reinvent hinself, surprise the world of football again with hin natural killer instincts, hin go be like new signing for the new season.

Advertisements

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s