Carlo Ancelotti dey vess for Lewandowski’s agent, say the guy dey talk like parrot, say na the guy dey fuel Manchester United to chook eye for the Bayern Munich striker as the 28-year-old future dey uncertain for Germany.
The 28-year-old bin enjoy life with the German side last season, as e tear net 43 times as Bayern carry League title. Bayern Munich don set new record self, na dem be the first team wey don win five Bundesliga titles straight.
The Poland international bin sign new five year deal in December but hin agent, Maik Barthel, don commot yab Ancelotti and Lewandowski’s teammates, say na dem cause why e no win Golden boot, say dem no support am.
Na that talk say dey ginger the striker to wakka commot from Allianz Arena, and Manchester United dey chook eye for the guy as dem go like use am replace Zlatan Ibrahimovic. On the other hand, Ancelotti talk say e no dey worried.
“Lewandowski never tell me say e dey sad, and i don hail am say e try last season,” na wetin Ancelotti yarn.
“I dey happy with everything wey e do and e dey happy with us.”
“As always, some agents wey dey this life too dey talk – and i no sabi why.”
“No be the first time wey agent don use newspapers to yarn rubbish. If say the guy get sense, e no go talk anything.”
For 2012, United bin dey consider Lewandowski but Sir Alex Ferguson con fashi am, as e sign Arsenal’s Robin van Persie.
Since the time wey Lewandowski wakka enter Bayern for 2014, e score 110 goals in the 147 games wey e don play and e don carry three Bundesliga titles, the DFB-Pokal and the DFL-Supercup.