Chelsea midfielder Nemanja Matic don dey yarn with the people wey dey manage Chelsea, onto say e don tire for Stamford Bridge and e go like relocate to Old Trafford to join Manchester United.
The Serbia international don dey linked to the Reds this summer onto say the Blues dey chook eye for Tiemoue Bakayoko from Monaco.
As Chelsea don almost complete the move for the £40 million Frenchman, Matic no wan wait till the guy come, na why e wan rake for Chelsea men, say make dem free am, say e no dey do again ‘Na by force?’
Bakayoko also dey linked with United, but Jose Mourinho no want am because e dey chook eye for Matic or Eric Dier (Tottenham).
Inter Milan dey also chook eye for Milan, but the latest reports wey we dey hear na say Antonio Conte never make up hin mind about Matic. Today e go talk say e wan sell am, Tomorrow, e go talk say e wan keep am. The man dey confused.
The reports wey we dey get from Daily Mail, na say the 28-year-old don clear Chelsea board say if dem no free am, say wahala go dey.
E shock everybody when Chelsea sell Juan Mata to Manchester United, so e mean say the Matic deal dey possible.
But now wey the Red Devils don snatch Lukaku away from Chelsea, the Blues fit dey reluctant to sell am to dem.