Today get as e be for Red Devils fans, as Manchester United wakka enter pitch to knack Real Salt Lake 2-1. Many fans bin dey expect say The Reds go demolish dem but no be wetin happen onto say the USA based club worry. The people wey score for United na Hernikh Mkhitaryan (29th minute) and Romelu Lukaku (38th minute).
We wan sharply talk about the five things wey we observe for the match:
The first thing wey we observe na say Manchester United no too play well. Dem allow make Real Salt Lake score first as L.Silva bin off our pant in the 24th minute. We sabi say e no tey before Mkhitaryan equalize but we bin dey expect heavy demolition but no be wetin happen. Enough room dey for improvement if dem go like carry Premier League title next season.
Another thing wey we observe na say Andreas Pereira try wella for second half. For person wey hin natural position na CAM, e try wella for the CDM position wey Jose Mourinho deploy am. We just dey pray make e fight hard, so Baba Special fit get am for mind.
Another thing wey we observe na say Jesse Lingard dey vess. E wan tranform to Lionel Messi over night. E play better ball and if e continue like this, e go hard Mourinho to bench am. Upon say Rashford and Martial get potential pass am, e use hardwork outshine dem today. Lingo Lingo u try against Real Salt Lake. Henrikh Mkhitaryan try too o.
Another thing wey we observe na say Romelu Lukaku tear net but e gots work on hin build-up play. The Belgian too dey lose possession. Honestly, if e no work on hin build-up play, make e no dey come midfield again, make e just remain for Striking position, as e go spoil ball if e come midfield. Mourinho get work to do.
The last thing wey we observe na say some United players no try today. Phil Jones bin play like mumu today and we no sabi wetin make Antonio Valencia collect red card ontop Friendly match. As for Chris Smalling, na the usual rubbish.