The first Manchester Derby wey happen outside England bin happen this morning and as God want am, The Reds bin show City who be boss. Dem knack dem sote dey wan shit for pant. The people wey score for United na Romelu Lukaku and Marcus Rashford.
We wan sharply talk about the five things wey we observe for the match:
The first thing wey we observe na say na the first time wey Manchester United don score goals, wey dem no concede for Pre-season. Bad Belle people go talk say na common friendly, but the truth be say you no fit down play the kind mad performance wey United show against City. Dem play fast game, dem defend well and dem block everywhere sote City play rubbish sote e remain small Guardiola gorimakpa hair for catch fire. This match bin sweet pass both of the Manchester derbies wey happen last season.
The second thing wey we observe na say Romelu Lukaku dey determined to succeed for Manchester United. The kind ginger wey e show, when e score hin goal, you go know say e wan shame all the haters wey dey doubt am, say e no go shine for the Reds. All the people wey dey talk say United miss out on the fact say dem no sign Morata go chop their words after the Belgian striker prove dem wrong. Another thing wey sweet me for the 24-year-old matter, na the fact say hin combo with Marcus Rashford make brain gan. So if Jose Mourinho wan deploy dem together next season, e no go bad.
Another thing wey we observe na say Marcus Rashford don transform to beast. We no sabi the kind treatment wey e do during hin holiday but e don dey grow muscles and hin speed don increase. The way e take make run, wey make Mkhi give am ball for the second goal make brain… After e collect ball, E con dissect City's pant. If e continue like this, e go give Jose Mourinho serious headache. The thing wey make me like Rashford na say, e no dey give up. When United bin buy Zlatan, e no give up remain for bench, e work hard sote Mourinho begin start am. Now wey Lukaku don come, na the same ginger wey hin dey show, say any time wey you use am, e go cause havoc.
Another thing wey we observe na say Paul Pogba bin show City "Who be Boss for Midfield". The way Maazi Pogba take control the whole midfield today, you go think say e be General. E bin ginger for attack and e also epp the defenders when City bin wan attack us. Na him wey play that ball wey Lukaku use score self.
The last thing wey we observe na say Henrikh Mkhitaryan dey on one kind mad form. E wan justify the big money wey United spend ontop hin head. Now we e don get strikers wey sabi make run and finish, e dey determined to ginger attack. Na him wey set up the goal wey Marcus Rashford score. If this guy continue like this, e go hard for am to see bench. Jesse Lingard self dey try for this pre-season, we just dey pray make hin form no drop as usual when season start.
The next match wey we get na against Real Madrid for Santa Clara and e go happen by 10 pm. This na like the pre-season of the UEFA Super Cup.