Five Things wey we observe as Manchester United knack Real Madrid 1-1 (Penarity 2-1)

Manchester United don continue their fine form in pre-season, after dem knack Real Madrid 2-1 for penarity shootout. The match at Full-Time bin end 1-1. The person wey score for The Reds na Jesse Lingard after Anthony Martial send d whole Real Madrid defenders go message, say make dem go buy gala. E con pass 2 Lingard wey burst deir yansh. Real Madrid con equalize for second half after Victor Lindelof dash dem free pena.


We sharply wan talk about the five things wey we observe for the match:

The first thing wey we observe na say the underdogs wey dey the club (Martial, Pereira, Fosu-Mensah) bin play pass the senior men tonight. We no sabi wetin wey Paul Pogba chop before this match because e play beautiful nonesense. For first half, United impress me, dem hold possession, dem no fear Madrid senior men. Even Fellaini self impress me for first half. Second half na error, na rubbish we play. Paul Pogba go just dey stroll with ball like say e dey hin palour, and small stout dey hin hand.

Pep dun reveal the Ex-Manchester United player him wish him fit sign for City

The second thing wey we observe na say everybody don dey wound as if say na turn by turn. Before now, Luke Shaw, Marcos Rojo, Juan Mata, and Ashley Young bin dey injured. Now Ander Herrera don join that list. The Spaniard no even tey for field, na as e enter one Madrid players rush am, fall ontop am, injure the guy for back. Herrera con dey hold hin back, and Mourinho con replace am with Scott McTominay. The thing pain Mourinho and e show for hin face. We at MUIP don dey arrange Touts wey go fly enter Carlifornia to beat that Real Madrid player wey wound our Herrera.

Another thing wey we observe na say Phil Jones bin get one of hin best Manchester United performances, while Victor Lindelof on the other hand bin play like complete moron. I no know whether him and Chris Smalling exchange brain self because the guy no try tonight. E sure me say Mourinho go give am serious warning, say make e no try that kind tackle when League start.

Who go wear our No.7 shirt for Manchester United?

Another thing wey we observe na say Anthony Martial na ‘one moment of brilliance’ player. The truth be say we dey expect more from the French international. Everybody sabi say Martial na good player but the main problem be say e no dey consitent for 90 minutes. Before hin assist, e play rubbish, e just dey lose possession up and down but after the village people wey dey hold hin brain, release am small, e con destroy the whole Madrid defence before e link up with Lingard. After that assist self, e no do anything again.. We at MUIP dey pray make Martial improve so Old Cargo Perisic no go bench am, when e come Old Trafford..

The last thing wey we observe na say the future dey bright for Manchester United. The way Andreas Pereira and Fosu-Mensah’s blood don dey hot, e no go tey before we begin dominate Premier League again. Fashi say our strikers (Rashford and Lukaku) bin no dey involved tonight, e sure me say dem two go score enough goals next season.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s