Manchester United’s Brazilian winshy winshy Andreas Pereira dey believe say the Reds go benefit from the Barcelona match wey happen for Maryland. E talk say him and hin teammates don learn better thing from the match even if dem set yansh, collect 1-0 knacking from Barca.
Na the first defeat wey the Reds dey get for pre-season onto say dem don knack LA Galaxy, Real Salt Lake, Manchester City and Real Madrid for their previous games.
While e dey pain say United don lose their unbeaten run, Pereira believe say the match don epp am well.
“Na good test, e dey good for us onto say e don epp us to know how we go react when Champions League start,” na wetin Pereira yarn ontop UCL football.
“If we dey play against strong teams, e go improve us and e go make us hard.”
“We dey test ourselves and e sure me say this experience go epp us in Champions League this season. We go know how to set up against Barcelona if we jam dem.”