So United don land for Europe again… Ehen! Manchester United bin finish their USA pre-season tour on Wednesday. The USA tour bin make sense for the Reds after dem knack LA Galaxy, Real Salt Lake, Real Madrid and Manchester City. The only match wey dem lose na against Barcelona. Now the Reds dey fly enter Oslo to face Norwegian side Valerenga. The official match time na 6pm.
How you fit follow the match? We go dey update una ontop the match for our Official Twitter handle @ManUtdinPidgin
Team news dey? Jose Mourinho don confam say hin spanish men Juan Mata and Ander Herrera don dey full ground, and dem fit play against Valerenga. Dem two don dey train small small. The people wey still dey injured na Ashley Young, Marcos Rojo, and Luke Shaw. Ashley Young don dey train small and we dey expect am to return in October. As una sabi say Eric Bailly get European ban (E no go fit play against Real Madrid for Super Cup), Jose wan experiment Victor Lindelof and Chris Smalling, to see if e go use dem against Real Madrid.
Who we dey face? The team wey we go face na Valerenga. Domestic League don already start for Norway and Valrenega dey siddon for seventh position after 16 games. Last season, dey bin finish for mid-table. Mourinho’s men go dey hope say dem fit knack dem apako.
Wetin we dey predict? We at MUIP dey predict 5-0. As dem be small club, 5 goals no go too much. I for talk 10 but i no wan make we disgrace dem for their house.