Manchester United manager Jose Mourinho yarn say the €222million wey Paris Saint-Germain drop for neymar no dey expensive.
On Wednesday, Barcelona confam say dem don give permission to Neymar, say make e no train with the club as e dey prepare to relocate from Spain to France to join PSG.
United bin try sign Neymar two years ago but Barca no gree sell and Reds Boss Mourinho dey claim say the move dey one kind one kind. Mourinho don compare the Neymar move to the Paul Pogba £89m own wey happen last year.
“When we bin table that money for Pogba, i bin tell you say e no dey expensive,” na wetin Mourinho yarn. “Expensive na when you buy person wey no too sabi ball for high amount.”
“Na the same thing wey go happen with Neymar, To me hin no dey expensive for 200 million. I dey reason say e no dey expensive, The only reason why you fit talk say e dey expensive na because now some clubs go dey put players wey no too sabi ball for 100 million, you go see more 80 million players self, 60 milla self.”
“I dey reason say Neymar na one of the best players wey dey this world, hin brand strong self, and e sure me say PSG for don reason the matter well before they gree say dem go drop the bar.”