Ryan Giggs don yarn the two places wey dey worry am ontop matter wey consign Manchester United’s £75million signing Romelu Lukaku.
The Beligian international bin wakka enter Old Trafford earlier this summer and the main reason why the Reds buy am, na because dey (United attackers) bin dey miss fire last season.
Na only 54 goals wey the Red Devils score last season, na big shame for club wey big like Manchester United.
To make matters worse ehn, the person wey score most of the goals, Zlatan Ibrahimovic don wakka commot after that serious leg injury wey e get for Europa League. Now Ryan Giggs dey pray make the new striker surpass Zlatan, so United fit fight for the Premier League title.
“Manchester United bin dey crave new blood since last season and the fact say Ibrahimovic wounjure bin make matters easier onto say e no be like say dem replace am,” na wetin Giggs yarn for Sky Sports. “Lukaku go tear net, e sure me die.”
However, Ryan Giggs dey doubt whether the 24-year-old sabi deal with pressure, and e dey worry say the guy first touch go affect am for United.
“E gots work on hin first touch but e don already score many goals for West Brom and Everton and e go see more chances at Old Trafford.”
“The only thing wey e dey lack, na say e never experience that kind pressure to be Manchester United foward. The fact say if e no play well, fans fit dey yab am.”
“Plenty home matches bin happen last season wey United bin dey waste chances like water. No be only Lukaku dey responsible to score sha, hin teammates self gots focus so dem go fit dey tear net wella.”