UEFA Super Cup: Real Madrid v Manchester United [Na Must Read!]


Like play like play pre-season don finish and the serious business don start for Manchester United. The first official match wey the Reds get na against Real Madrid for UEFA Super Cup on Tuesday August 8. The first person wey fit predict the right scoreline go win N500 recharge card.

How you fit watch am? The match go start at 7:45pm and we give una live commentary via our official twitter handle @ManUtdInPidgin.

How our pre-season take be? E make mad sense. Out of the seven matches wey we play, na six we win. First na LA Galaxy we knack 5-2 sote dem wan shit for pant, later we con scale past Real Salt Lake as we knack dem 2-1. After that one, we con demolish Man City 2-0, then we con beat Real Madrid on penarities after we play 1-1 with dem for full time. The only match wey we lose na the 1-0 loss against Barcelona. We con knack Valerenga 3-0, then we beat Sampdoria 2-1.

Demi Mitchell dey progress with Manchester United – E go blow?

Who go play the match? The Reds go dey without Eric Bailly and Phil Jones onto say UEFA don suspend dem, while Victor Lindelof, Romelu Lukaku and Nemanja Matic fit play their first official matches for the club. Real Madrid boss Zinedine Zidane dey fear say Gareth Bale no go play due to fitness problem and e never dey sure whether Cristiano Ronaldo go play.

Wetin be Super Cup?  Na Cup wey be like Community Shield but this time, na the battle between Champions League & Europa League winners. Real Madrid bin knack Juventus 4-1 for the UCL final to book their place, and Man United knack Ajax 2-0 for UEL final (Note: Europa League na the competition wey Arsenal go play next season as Wenger and hin boys go try defend our title but we know say dem no fit carry am.)

Cristiano Ronaldo go prepare wella to face United for UEFA Super Cup

How United dey do for Super Cup? Na only three times wey the Reds don play Super Cup, but na only once wey dem don win, and na when dem knack Red Star Belgrade 1-0 for Old Trafford in 1991. The other two times, na 1-0 defeat against Lazio in 1999 and 2-1 defeat against Zenit Saint Petersburg in 2008.



Na who go ref the match? na Italian official Gianluca Rocchi wey go take charge on Tuesday. We go pray make e no do ojoro as everybody sabi say UEFA go wan make Real Madrid win am.

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s