Players report card ManUtd vs WestHam 4-0

GettyImages-831041790

Our first game of the season na him be this and we all know the pressure wey dey on our team onto say we no fit afford anything than straight win. The pressure double self as our rivals for the league new signing score for their debut game. They don rest dey wait to see wetin go happen to our team today but God pass man.

Na the best game wey i don watch under Mourinho be this as na from start to finish be attacking, no dull moment for the game. Wetin make the game sweet me no be just say we attack well but how the whole team just blend like bread and butter.

If we fit keep up with this kind performance, i no see any reason why we go dey drag Europa league ticket or draw soup result with small teams.

Na my own players report card be this, make una enjoy am

DeGea : as usual, wonderful performance when ever dem call am to action. He no too do plenty for this match but that save wey he make alone for dying minute for first half na more than enough. I give am 7

Valencia : provide plenty support for both attack and defence. He make sure say he provide plenty space for flanks and create width for the team. Him crosses self dey okay for the game. I give am 6

Jones : he defend the game really well and i dey impressed with him game. Except for that one time wey he tackle Valencia, him game today na ogbonge. He pocket Chicharito throughout the game. I give am 7

Bailly :  super man, he dey always give him best. He make sure say he deliver as usual. He make us show say na him be the missing link for that super cup match. I like him man marking of Arnautovic as he no allow any smell-smell for the match. I give am 7

Blind : he no too hold him side for the game but at least he still put good performance. From the players wey start the game na him i fit say worse but still i give am 6. This show say the game make plenty sense.

Matic : man of the match. He just do wonderful things simply. Him passes na direct, interceptions and runs na with purpose. I like how he jsut keep am simple, no fancy even when he run with ball dribble 3 people na simple he do am. Him presence for the team don give the midfield stability and defence cover. He don also allow Pogba to dey go forward. I give am 8

Pogba : he really play well for this match. I like how he use the opportunity wey Matic give am to dey drive go forward and him passes wey he do na ghen ghen. Him goal dey well needed for him confidence boost. I give am 7.5

Mkhitaryan : him sweet passes and ball control/holding skills really help. We all see him through pass for Mata even though he no score and him cross for Lukaku second goal dey on point. I give am 7

Mata : he get good game even though he be like say he quiet but he really make sure say he work the Hammers defenders. I give am 7

Rashford : he really need to work on him finishing. He for easily get 2 good goals for that game but him finishing no be am at all. Him run to give Lukaku pass to score after Matic break play na why i go rate am 6

Lukaku : na wetin we don miss since for striker be this. Truth be say , he go fit miss chance but we all know say he sabi where post dey and he go knack ball enter if he get better pass. Him movement really help the team and na why he fit score the goals wey he score. I give am 8

GettyImages-831036626

Substitution:

Martial : he enter and he really add bite to the team as he make sure say he run the defenders ragged. He also benefit as he score one sweet goal. I give am 7

Fellaini :  he no do much but i like how he enter and balance the game. I give am 6

Lingard : no time to rate am, he no really get any impact.

Na the players report card be that, make we just wait till our next game and see if we fit repeat this kind performance, till then make we remember say #UNITEDWESTAND

 

 

Advertisements

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s