On Saturday, Baba Jose go jam one of him apprentice. See ehn, I de pity Swansea. Even them dey fear for themselves as they wan play us. So make we sha give them respect do small check on them before we knack them left, right and center.
Last season, they been get only 2 quality players- Sigurdsson and Llorente. They don sell Sigurdsson give Everton carry money put inside bank. Llorente come get injury wey him just recover from but him no go play this match. The worst part be say they never sign any better person. So, they no get any meaningful person again.
But we know say their style of play na to put ball for ground knock am around. As they dey play the biggest club for England, na only counter attack be their hope or any of our players make silly mistake. But things don different now. Their opening day fixture wey they play against Southampton been dey too one-sided. They allow Southampton 26 shots and na die be that if they allow us up to that amount. Infact we still dey vex for them because they follow for the people wey collect draw for Old Trafford last season.
So, na easy win wey we no go too sweat for tomorrow. We go finish the match by 60 minutes as e get party wey Pogba and Bailly don book say them go attend later.