O Boi, This kind demolition run wey Manchester United dey do now, E still dey do me like film trick. Last week, dem knack West Ham 4-0, now dem don knack Swansea 4-0. The people wey score for the Reds na Eric Bailly, Romelu Lukaku, Paul Pogba and Anthony Martial.
We sharply wan talk about the five things wey we observe for the game:
The first thing wey we observe na say Manchester United dey on fire. From everything wey i don see so far, Nemanja Matic na the missing piece to Jose Mourinho’s perfect United team. The way the guy take sit back, dey dictate the game make brain. When Jose bin sign the guy, many fans bin dey moan about onto say dem think say e go flop but the truth na say e don provide balance to the team. The only thing wey fit dey pain fans now na say our Last Year’s player of the Season ‘Ander Herrera’ never kick ball for League this season. Make we dey see sha, when UEFA Champions League start, Herrera go dey see game time.
The second thing wey we observe na say Maroune Fellaini and Anthony Martial be game changer today. Before dem enter, United bin dey try preserve their 1-0 lead to secure 3 points, but after dem enter, the game con open up and chances con dey fly left right & centre. Before all man know wetin happen, na 4-0 i see for score-line. The truth be say when Fellaini and Matic play together, e dey free Paul Pogba as e dey give am chance to go front to support attack. For me ehn, Pogba na the Best Player ontop pitch as e get hand for all the goals wey the Reds score.
The third thing wey we observe na say Marus Rashford gots work on hin finishing if e wan dey start week in week out for Manchester United. Sometimes, e go finish like professional wey get 100 years experience, another time e go finish like say hin brain dey ontop Third Mainland bridge. Na him wey ginger pass for United for first half but many people dey criticize hin performance because e miss many big chances wey e suppose score.
Another thing wey we observe na say with the kind partnership wey Eric Bailly and Phil Jones don form, If Jones no wound, Victor Lindelof go warm bench tire. I dey even pity Lindelof because if Marcos Rojo come back, things go dey hard for am, e fit no see bench. My advise to am, na make e improve. For this match, Jones & Bailly try wella, dem cover for eachother with their NO-NONESESE CLEARANCE.
The last thing wey we observe na say Manchester United fit fight for Premier League title this season. We know say season just dey start, but the kind confidence wey we don see so far, if dem continue like this, nothing go dey between dem and the title. E sure me say their performance don dey strike fear for our rivals body. We at MUIP dey very happy and we dey pray for more of the same.