Eric Dier don yarn say e bin no wan ask for transfer request when e hear say Manchester United wan buy am.
Jose Mourinho bin wan sign Dier this summer but as Tottenham no gree sell, e con turn hin attention to Nemanja Matic and like play like play, the Serbian don start well for Old Trafford.
Reporters con jam Dier when e dey on international duty with England and dem ask am about the transfer matter and e con respond.
“I dey reason say e dey better if footballers dey only worry about wetin dey happen ontop pitch,” na wetin Dier yarn. “Na how i take dey live my life be that. I dey reason say if i play well ontop pitch, every other thing go sort hinself out.”