Manchester United midfielder Nemanja Matic talk say e pain am say the Red Devils no fit wakka commot with three points for Stoke Stadium, but e believe say the Reds don learn many good things from the match.
Na Stoke City first score after Maxim Choupo-Moting tear our yansh, but e no tey as Marcus Rashford con revenge before ref blow half-time whistle…. Last Last the match bin end 2-2 at the bet365 Stadium.
The Serbian admit say United bin see three points for their front, but dem no fit grab am, but e dey impressed with the kind fighting spirit wey the Reds show after Stoke first score.
“The game no easy at all,” na wetin Matic yarn. “If i go dey honest, e dey always dey hard, make person wakka enter Stoke house to knack dem. Stoke sabi play ball, so the match bin dey hard, but we manage see one point.”
“If we wan carry League, we gots dey win these type of games. We sabi say if you dey play these kind teams, you gats put extra effort, you gats put head for ground so you go fit concentrate wella and ehen, we no dey happy with one point.”
“But the fact say we fit come from behind, show say we get fighting spirit. We bin dey lead for second half, den dey con see corner score. If say we bury the chances we see after that, we for don win.”
Matic and United now go dey chook eye for the UEFA Champions League tie against Basel wey go happen on Tuesday night by 7:45pm.