Tonight na good night for Red Devils fans as Manchester United wakka enter back UEFA Champions League and the first thing wey dem do na to demloish Basel 3-0. The people wey score for the Reds na Maroune Fellaini, Romelu Lukaku and Marcus Rashford.
Now the next match wey the Reds get na Premier League tie against Everton wey go happen for Old Trafford on Sunday.
But before then, we at MUIP wan talk about the five things wey we observe for the game:
The first thing wey we observe na say Maroune Fellaini substitution na blessing in disguise. No be say i dey thank God say Paul Pogba don wound, because the injury pain me self. But the koko na say, the introduction of Baba Fellaini na the changing point in the game as na him wey score the first goal, and e also get hand for the goal wey Rashford score. The way Jose Mourinho don improve this guy ehn, e shock me but Fellaini na very important player for the Red Devils now.
The second thing wey we observe na say Victor Lindelof and Chris Smalling be like Dumb and Dumber. Them two try against Basel as dem manage keep clean sheet but the problem wey i get with dem na say when Basel dey worry us and pressure dey, dem go defend wella but when no pressure dey at all, dem go begin shake, dey pass like mumu, dey pass like say dem dey play against Barcelona or Real Madrid. E sure me say Jose Mourinho go address the issue.
Another thing wey we observe na say our midfield combo of Maroune Fellaini and Nemanja Matic bin tap today as dem no gree make Basel see anything play. Almost all the Basel players frustrate say Fella and Mathematics just dey bully dem. E reach one time wey Fellaini con dey do skill self. We just dey pray make Pogba wound no serious as the combo of Pogba, Fellaini, and Matic dey make sense.
Another thing wey we observe na say Henrikh Mkhitaryan na good player but e gats work on hin consistency level if e wan compete with the likes of Cristiano Ronaldo, Lionel Messi and ko. If e wan become the pillar of the Red Devils, e gats dey deliver week in week out. E try today but if say e dey on mad form tonight, e for don get assists & goals, as e miss many chances. Later, e con dey miss-pass self. E remain small one of hin bad passes for cost Manchester United but David de Gea bin make one mad save to deny Basel.
The last thing wey we observe na say the future of Marcus Rashford dey bright for Manchester United. The last time wey any player get hin kind flair na in the days of Cristiano Ronaldo, Eric Cantona, and ko. Men wey fit cause trouble any time dem touch ball. Now Rashford don score on hin debut in the Champions League, E mean say you fit call am ‘Debut Master’ because any time e play any competition for the first time, e go score.