As Manchester United don manage knack Southampton 1-0, now the Reds don turn their attention to their second UEFA Champions League group stage match wey go happen against CSKA Moscow at VEB Arena on Wednesday night.
The United players don already move go Russia and we at MUIP dey pray make dem come back with three points.
The truth be say the match go hard as CSKA Moscow no be small team. For their first UCL match this campaign, dem wakka enter Benefica house, knack dem 2-1. The only thing wey United dey use gap dem now na goal difference. If Jose Mourinho’s men fit win on Wednesday, e mean say dem go dey in the driving seat in Group A.
Team News: The Red Devils go dey without midfielder Maroune Fellaini as e woundjure against Southampton. Paul Pogba self no go play as the wound wey e pick up against Basel still dey worry am. From wetin we dey see, Matic go partner either Herrera or Carrick as this match dey too big for Scott McTominay to play. For defence, Jose Mourinho gats decide whether e go rest Eric Bailly and Phil Jones, so Chris Smalling and Victor Lindelof fit see game time, or e go use dem like dat.
Wetin we dey predict: We at MUIP dey predict 3-1 in favour of United, and Lukaku go score the first goal. Then Rashford and Martial go con give dem jara.