Manchester United players and fans been travel all the way to Russia for the Champions league match day 2 group game. Before the match start, Mourinho yarn say the match go hard gan. But last last we knack them 1-4 for their own backyard. The players been impress wella and na their ratings be this. Enjoy am!
David de Gea: Number one! He make some decent saves to deny CSKA Moscow when they been dry attack us. He show him class and sabiness through out the game. Na only one goal he concede towards the end of the game. I give am 7
Victor Lindelof: The Swedish defender don improve wella. He try against CSKA striker and make some important blocks. I give am 6.5
Chris Smalling: He no make any errors today. Calm and collected game. Him bully them opposition strikers and no let any ball pass am. I rate am 6.5
Eric Bailly: Iron man! Bailly no dey follow anybody play o. Just dey tackle and make important blocks to frustrate the opposition. Him passes good too. I give am 6.5
Ashley Young: I no understand the kind winch Mourinho use for this guy o. He don turn Sabi wingback: left or right he go still do you shege. Him try wella for attack but he gots work more on crossing. Defensively, he no get flaw. I give am 6.9
Daley Blind: Sabi boy! Blind boss him wing. Like say he wan open 5 start hotel inside CSKA Moscow half because na there he stay for most of the game. Him contribution make sense. I give am 7.
Nemanja Matic: The level of consistency this guy get ehn. I just wan use this medium thank Chelsea once again as them give us diamond. Him try wella for this game. Marking, interceptions and passes.. All na 100/100. I rate am 7.5
Ander Herrera: He boss the midfield well for this game. Make some good tackles and interceptions. Him don dey pick that him last season form. With the way he play today, we no go too feel Pogba absence. I give am 6.7
Henrikh Mkhitaryan: Mkhi Mkhi na winsh. He keep things flowing for attack although him through balls no lead to assist for this game he try all round. He grab one goal as Martial shot knack keeper before he follow am tap in. I rate am 6.7
Anthony Martial: The kind mad form this guy dey now eh. Me sef dey fear for other teams. Who you be wey M9 no go dribble. He impress me this match I no go lie. 1 goal and 2 assists win am MOTM. I give am 9!
Romelu Lukaku: Goal scoring machine! He continue him goalscoring form again as he knack them two goals. Him gameplay overall na baba. At this rate, e sure me say na 25 goals + he go score this season. I rate am 8!
Jesse Lingard: He enter for Mkhitaryan for second half and settle in nicely. He still threaten to score more goals but bad luck follow am. Overall good game. I give am 6.
Marcus Rashford: Replace Martial for 72 minutes after he wound small. Him pepper their defenders with some good runs. Unfortunate not to score. I give am 6.5
Matteo Darmian: He enter to replace Ashley Young and he keep up the good work. Average game in general. I rate am 6.
Na the match ratings be this. Our next game go be for Old Trafford as na Crystal Palace we dey take on next. Make una chook eye for ManUnitedInPidgin for more updates. Never forget #UnitedWeStand