Former Reds Midfielder Roy Keane don react ontop the 4-1 knacking wey Manchester United give CSKA Moscow in their Champions League match on Wednesday night.
The Red Devils Legend believe say Jose Mourinho don restore the glory days back to Manchester United.
“Na the United wey i sabi be this now,” na wetin Keane yarn for ITV.
“The way i dey look dem so ehn, e be like say dem dey ready to lift big trophies. Last year/Last two years ehn, You fit talk say maybe dem go win League Cup or one small cup.”
“Now dem don return to Champions League and dem dey do well. You expect say dem go make am to the next round of the Champions League and you dey expect dem to fight for Premier League title.”
Ontop Romelu Lukaku matter, Roy Keane believe say the Belgian sabi ball and e talk say the £75m wey United pay ontop am, dey very cheap compared to wetin e dey offer.
“Lukaku na player wey sabi, and e still young self (24). Make i dey honest ehn, that £75m wey United pay for am na peanut. The guy just dey burst yansh for Premier League, e dey speak well and e no dey behave like agbero.”
“The top United strikers dey score for big matches and e gats deliver in big games. When hin team dey 1-0 or 2-0, na that time wey e (Lukaku) suppose tear net, and e suppose do am for big matches.”