Five things wey we observe as Manchester United knack Crystal Palace 4-0

Na another 4-0 knacking wey happen for Old Trafford, as Manchester United demolish Crystal Palace sote e remain small dem for shit for pant. The players wey score for the Reds na Juan Mata, Maroune Fellaini (2), and Romelu Lukaku. The Red Devils don catapult back to the top of the table with 19 points, ahead of the clash wey Man City get against Chelsea.

We wan sharply talk about the five things wey we observe for the match:

The first thing wey we observe na say, the rotation wey Jose Mourinho dey do between Marcus Rashford and Anthony Martial bin dey fruitful once again as na Rashford wey do assist for the goal wey Juan Mata score. Na Rashford wey also do assist for the second goal wey Maroune Fellaini score, as e cross one dangerous ball inside box. Martial con enter for Rashford in second half, and e do assist for the goal wey Lukaku score. The competition between Rashford and Martial dey improve both of them, and we dey pray make things continue like that.


The second thing wey we observe na say Maroune Fellaini bin dey outstanding today. The Belgian international bin prove hin haters (awon Herrera FC) wrong again as e manage score two goals against Crystal Palace. The Big man don dey repay the faith wey Jose Mourinho put hin am. We at MUIP dey pray make e continue like this, so e fit lead us to many victories in the absence of Paul Pogba, wey get long term injury.

Another thing wey we observe na say Manchester United’s defence dey very solid this season. Upon say Eric Bailly no play, as na Smalling replace am, the Reds still manage keep another clean sheet. The truth be say Crystal Palace no even worry De Gea today self. Apart from that shot wey Sakho play, Dem no get another chance on target. Smalling and Jones bin impress me as dey bin dey solid against Palace.

I no go rest Lukaku until Zlatan come back, Manchester United need am – Mourinho

Another thing wey we observe na say United’s midfield bin try today as Maroune Fellaini and Nemanja Matic control the match sote Crystal Palace no see anything play. Anytime wey their players hold ball, Fellaini and Matic go rush dem, steal ball back. Unlike last week wey United struggle against Southampton for midddle, the Reds bin dominate today’s game from start to finish.

The last thing wey we observe na say Romelu Lukaku dey very important for United, even for the matches wey e no play well. Everybody sabi say the Belgian no too play well today, but e position himself well to receive the ball wey Martial give am, to score hin 11th goal in all competition. For Premier League, Romelu Lukaku don score 7 goals in 7 games for Manchester United and e sure me say e go score pass 20 goals this season.

Our next game na against Liverpool, but na after international break.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s