The Premier League dey return this weekend after international break don wakka past, and United dey ready to face one of their biggest challenges so far this season when Jose Mourinho’s men travel go Anfield to face Liverpool at 12:30pm.
How you fit follow the match? We at MUIP go run live commentary for our official twitter handle @ManUtdinPidgin.
Team news dey? The Reds fit dey without three midfielders on Saturday as Maroune Fellaini (Knee Ligament), Paul Pogba (Hamstring) and Michael Carrick dey injured. Liverpool go dey without Sadio Mane (Hamstring), Dejan Lovren and Nathaniel Clyne.
How Liverpool season take be so far? Liverpool’s PL season get as e be as dem don knack Crystal Palace and Arsenal, draw against Watford, and Manchester City knack dem 5-0. For Cup competitions, na so so rubbish dem dey do as Leicester City don kick dem out of Carabao Cup, and dem never win any match for Champions League yet as dem don draw 1-1 against Sevilla and Spartak Moscow.
The last time we jam? The last time wey United and Liverpool play, na 1-1 e finish as James Milner and Zlatan Ibrahimovic tear net.
Who go ref the match? Na Martin Atkinson. Na him wey ref during United’s opening game of the season, as the Red Devils knack West Ham 4-0.