The Red Devils of Manchester don turn their attention to the UEFA Champions League as dem dey travel enter Portugal to face Benfica on Wednesday night. Jose Mourinho’s men currently dey on six points after dem knack Basel and CSKA Moscow. If United fit win for Lisbon, dem go don chook one leg inside knock-out rounds.
How you fit follow the match? The match go start at 7:45pm (Nigerian Time) on Wednesday and we go run live commentary for our official Twitter handle @manutdinpidgin.
Team news dey? Paul Pogba and Zlatan Ibrahimovic still dey injured. Marcos Rojo still dey work on hin fitness but e dey part of the squad wey travel go Lisbon. Na Jose Mourinho go update us on the fitness of Eric Bailly, Maroune Fellaini and Michael Carrick when e do press conference on Tuesday. For Benfica, right-back Andrea Almeida go miss the match, after e collect red card against Basel.
Benfica dey good form? Benfica dey good form for League, as dem dey siddon for third position in Liga Nos. Na only one match wey dem don lose for their opening eight matches. The defeat bin happen last month, as Boavista knack dem. However their form for Champions League dey very bad, as dem don lose 2-1 to CSKA, and Basel thrash dem 5-0.
We don play dem before? Manchester United don play dem nine times, and na six times wey the Red Devils don win.
Who go ref? Na Germain ref Felix Zwayer. Na him wey ref the 1-1 draw wey United get against Rostov in Europa League Round of 16. The linesmen na Thorsten Schiffner, Marco Achmuller, and Rafael Foltyn. E never finish o, as Daniel Siebert and Sascha Stegemann go be additional assistant refs.
Wetin we dey predict? We dey predict 4-1 in favour of Jose Mourinho’s men. Romelu Lukaku go score brace, while Martial and Juan Mata go score.