Tonight na good night for Red Devils fans as Manchester United knack Swansea City 2-0 for Liberty Stadium in the Carabao Cup. The person wey score for Jose Mourinho’s men na Jesse Lingard (2x). The next match wey the Reds get na against Tottenham for Old Trafford on Saturday.
We wan talk about the five things wey we observe for the match:
The first thing wey we observe na say Manchester United pikins bin play well. Marcus Rashford, Jesse Lingard, Axel Tuanzebe and Scott McTominay bin impress for the match. Na the best match wey Lingard don play this season as almost everything wey e do make brain. E remain small e for score hat-trick.
Another thing wey we observe na say Manchester United bin dey defensively solid tonight. The only person wey mess up small na Victor Lindelof as e bin do two errors wey Swansea bin wan use score for first half. In the second half, e try sha as e no do any error. Smalling and Tuanzebe on the other hand bin impress me for the game. Tuanzebe na the person wey start the move for Lingard’s second goal as e dribble three people in the build up.
Another thing wey we observe na say Jose Mourinho no rate Luke Shaw at all. Upon say Manchester United dey lead 2-0, Jose Mourinho still no put am early, instead e bin put Lukaku and Matic early. Then e con replace Martial with Shaw in the 85th minute. E sure me say Jose Mourinho go sell the left-back in January or summer, as e no rate am at all.
Another thing wey we observe na say Scott McTominay and Ander Herrera’s combo bin make sense. Even McTominay and Matic’s combo bin tap as dem dominate Swansea when Matic enter for Herrera. Now wey Maroune Fellaini and Paul Pogba never come back, maybe Mourinho go dey reason McTominay matter? Na only time go tell.
The last thing wey we observe na say Romelu Lukaku’s confidence don decrease. The Belgian international no even ginger for attack when e enter. The supply to Lukaku no make sense self, so no be hin fault. We just dey hope say e go score against Tottenham on Saturday.