Five Things wey we observe as Manchester United knack Benfica 2-0


Manchester United don chook one of their legs inside the next round of Champions League after dem knack Benfica 2-0 for Old Trafford. The people wey score for the Red Devils na Mile Svilar (O.G) and Daley Blind.

Na Nemanja Matic wey ginger for the first goal as e tear shot wey knack post, then the ball con hit Svilar enter net. For the second goal, na Marcus Rashford wey dribble three defenders before e con win penarity wey Daley Blind convert.

Right now, Jose Mourinho’s men dey lead the way in Group A with 12pts, Basel and CSKA Moscow dey on 6pts each, while Benfica dey on 0pts. The way this group take be ehn, United never qualify yet but dem dey in the driving seat to win the Group. Benfica on the other hand, fit still qualify.

We wan talk about the five things wey we observe for the match:

The first thing wey we observe na say Jose Mourinho no rate Luke Shaw at all. The English defender bin warm bench for 90 mins while Daley Blind bin dey for left-back position. Many fans bin dey expect Shaw to play today but Jose Mourinho bin use hin last sub to replace Anthony Martial, with Marcus Rashford. E be like say the Danny Rose rumours na true. One thing wey we sabi about Mourinho, if e wan sell person, e go hardly play you. Since e no get plan for Shaw, make e kuku ma sell am in January, than to dey keep am for bench or reserve.


The second thing wey we observe na say Benfica goalkeeper Mile Svilar dey try but e get bad luck against Manchester United. For that first leg, na hin error give the Red Devils three points. Today, Benfica bin dey pressure United before the own goal wey e score. Honestly, i no go blame am for the own goal but na bad luck catch am, as the shot hit hin back before e enter post. But we wan hail am for that Anthony Martial penarity wey e save, e try for that one.


Another thing wey we observe na say Scott McTominay na the future. The midfield of McTominay and Matic bin struggle small for first half, but later e con stabilize, especially for Second half when Herrera enter pitch…McTominay bin play very well, especially for second-half. E dey confident with ball, e no dey fear and e throw some passes wey make brain. The future dey bright for this boy, as long as e no go begin runaway like Andreas Pereira.

Another thing wey we observe na say Manchester United no dey play beautiful football again like when the season start, but dem dey get the job done. Jose Mourinho na person wey no dey known for attractive football so e no suprise me. The first 30 minutes of the match tonight bin dey horrible, Even when United score, e shock everybody as na Benfica dey play well, dey mount pressure. United bin dey lucky to keep clean sheet today as Eric Bailly and Smalling bin make some errors but David de Gea bin epp the Reds with top saves to deny Benfica.

Lastly, we observe say Jose Mourinho bin deny Romelu Lukaku penarity kick as e bin wan save the striker from United fans. The penarity wey Rashford win, Lukaku bin wan take am. E even go carry the ball, drop am for the spot, as e dey prepare to take am. Mourinho just shout from touchline, say make Blind take am. As Blind take am, e score am. The problem wey dey with that penarity na say, If Lukaku for take am and e miss, e for give fans more reasons to insult am, so e good as e jejely allow make Blind play am.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s