Manchester United defender Chris Smalling bin follow Mourinho to the conference room as him self yarn hin mind ontop how the Champions League match go take be.
E be like say Basel pitch no dey in order so reporters con ask Smalling about am and this na wetin e yarn: “E dey hard to know for now, na when match start tomorrow, we go know if e good or not. But wetin i don see so far no bad. We hope say we fit entertain una ontop am sha.”
Smalling bin also yarn ontop the Centre-back options wey dey for Manchester United: “Every week, we dey sabi ourselves more. Many people dey here wey fit play defence. I dey reason say all of us fit play together.”
The Defender bin also yarn ontop Jose and hin tactics: “E dey study other teams like say e wan write final exam before e tell us how we go play. As me and am don dey relate better now, i don dey understand the instructions e dey give me.”
Ontop the Basel clash, the Defender dey positive and e believe say Manchester United fit pick up all three points.
“Our Moral gats change because we gats attack more,” na wetin Smalling yarn. “We gats burst their yansh wella. Even pass the one wey we do for Old Trafford. The match dey hungry us. We get three or four attackers wey fit cause havoc so if we fit seal our yansh, we don win already”