Na sad night for Manchester United fans as the Red Devils bin lose 1-0 against Basel. The scoreline no dey even pain me. The thing wey pain me pass na the fact say, our players bin play like say the match no consign dem. Anyway na the five things wey we observe dey below:
The first thing wey we observe na say Manchester United bin play well for first half as dey bin create some chances. Martial’s cross knack post and Rojo’s shot knack bar. But for second half, United play total rubbish as Basel bin dominate am, sote dem manage score self.
The second thing wey we observe na say Manchester United bin play like say Louis van Gaal dey coach dem. For this match, no ginger dey am at all. The person wey i go blame na Jose Mourinho because e sure me say the players bin play according to hin tactics.
Another thing wey we observe na say Daley Blind and Matteo Darmian na the people wey play rubbish pass for the match. We take God beg Mourinho, no just use them as Left-back and Right-back again. To defend, na wahala. To epp for attack self, na wahala so wetin dey con dey contribute?
Another thing wey we observe na say as soon as Paul Pogba wakka commot, our game bin go from bad to worse. Pogba bin dictate play in the first half. For second half, Basel con dey worry us but as soon as the French man commot, na so so chance after chance wey Basel dey see. E no shock me say dem win 1-0.
The last thing wey we observe na say Manchester United players and Jose Mourinho need serious flogging for the kind yama yama performance wey dem show for second half. Na the worst wey i don see this season. If you no wan play well, no wear our jersey dey disgrace us. Even when the match na still 0-0, na sleep dey my eyes but as i see say dem score us. I no even know whether i go frustrate or i go laugh.