Manchester United manager Jose Mourinho don run press conference ahead of the Champions League clash wey hin side get against CSKA Moscow for Old Trafford on Tuesday night.
The Red Devils dey in commanding position to finish as Leaders for Group A. As everything take be, the only thing wey fit make United jah from the competition, na if CSKA knack dem like 6-0… Serious pressure go dey on CSKA Moscow as Europa League don dey call dem for phone.
Jose Mourinho don sharply provide updates ontop some of hin players. E bin confam say Paul Pogba go play against CSKA Moscow, but e talk say Nemanja Matic no dey available.
“Matic dey injured. When i talk say e don wound, e don wound,” na wetin Mourinho yarn. “I no dey follow una play, i be small pikin?. The guy no dey available jare.”
The boss don also confirm say Zlatan Ibrahimovic no dey injured but e dey work on hin fitness level.
“Zlatan no dey injured. E dey work hard on the muscles wey dey support hin knee. E gats work hard so the wound no go return,” Jose still dey yarn.
“All the players wey no play our last match still dey injured. But i fit suprise una tomorrow. I fit use one of dem, if e full ground by den.”
The United manager don confam say David de Gea go rest against CSKA Moscow. Sergio Romero go start and Joel Pereira go warm bench.
Mourinho ontop Shaw: “E dey work hard because e wan make i use am. Very soon, hin time go come. I go select am tomorrow, ehen, na true. Whether e go start, whether e go warm bench, na that one i no sabi.”