Na good night for Red Devils fans as Manchester United bin finish as Group winners as dem knack CSKA Moscow 2-1 at Old Trafford on Tuesday night for Champions League. The people wey score for the Reds na Romelu Lukaku and Marcus Rashford.
The people wey finish second for the Group na Basel, while CSKA don go visit Arsenal for Europa League. Now wey the Reds don handle the business for Europe, dem fit turn their attention to the Premier League match wey dem get against Manchester City this weekend.
We wan talk about the five things wey we observe for the game:
The first thing wey we observe na say Manchester United bin play wella for first half but dem just dey miss chances up and down. Before person know wetin happen, CSKA con score before first-half finish. Romelu Lukaku and Marcus Rashford bin dey miss goals like Arsenal attackers. The thing bin frustrate many fans. But we thank God say dem two con dey clinical for second half, as dem manage score the goal wey give United three points.
The second thing wey we observe na say Luke Shaw bin impress for the match. Everybody sabi say Shaw dey fight for hin life at United as Jose Mourinho no send am, na why e wan sign Danny Rose in January. But the English international bin shine foward wise in the match but e bin struggle small defensively. All round, e ball fire and if e continue like this, e fit revive hin United career, provided injury no catch am.
Another thing wey we observe na say our midfield bin dey solid today. Juan Mata and Paul Pogba just dey send people go message up and down. Paul bin control the midfield sote three CSKA players no fit mark am, and e also do assist for Lukaku’s goal. For first half, Mata play rubbish but e con improve for second half as na him wey do assist for the goal wey Rashford score.
Another thing wey we observe na say CSKA Moscow play rubbish. na luck wey dem use score. If i go dey honest self, their goal na offside. I no just sabi wetin the Linesman and Refs dey do, wey make dem no see am. Anyhow sha, the koko na say we collect 3 points.
The last thing wey we observe na say our defence bin dey solid today. I for wish make dem collect clean sheet but as na only one goal wey dem concede, e no bad like that. Now our attention don dey on City. You believe say we fit keep clean sheet against dem?