Today na painful day for Manchester United fans as the Reds bin lose 2-1 to City as David Silva and Otamendi bin fire the Blues to victory. The person wey score for Jose Mourinho’s men na Marcus Rashford.
Right now, e be like say Man City don win league because dem dey lead Premier League with 11 points. I no know how dem wan drop points self. Who wan beat dem? Oh well, we wan talk about the things wey we observe for the game.
Firstly, Manchester United bin start the match slow and we no know why. Man City bin dominate possession for first half. The game play wey United bin dey play na ‘Fling the ball to Lukaku and hope say e go better’ but e no work. The goal wey Rashford score self, na defensive error from City, cause am. Maybe na how Jose talk say make dem play.
Secondly, Romelu Lukaku fit don dash Man City the League title as na him wey do assist for the two goals wey dem score. For the first, ball wey e suppose clear with hin head, e do rubbish, ball go meet Silva wey punish us. The second one, ball wey e suppose clear wella with hin leg, e go shoot am for Smalling back and ball go meet Otamendi wey punish us. As e don mess up for back, e con get clean chance to equalize as Martial give am fine delivery but e go shoot the ball for Ederson body. See ehn, This guy gats improve against Top teams because wetin we don see so far na error.
Another thing wey we observe na say Manchester United bin miss Paul Pogba. As Paul no dey, e bin make things hard for us, attack wise as we bin struggle to create chances. Herrera and Matic bin try but the truth na say, Herrera no be Pogba and e no fit impact match like the french man. If say Pogba for dey, the match for dey different.
Another thing wey we observe na say Guardiola bin show Jose Mourinho ‘who be boss tactically’ today. Na City wey start the match well. Then for second half, as City con score again, e con replace Jesus with Mangala wey block everywhere. All the changes wey Mourinho bin make no impact the game. Lukaku wey e suppose commot, e play 90 minutes. E be like say Lukaku get Mourinho’s nudes.
The last thing wey we observe na say Ashley Young and Antonio Valencia bin try attack-wise for second half, But the problem na say, Why dem no play like that for first half? E be like say na Jose Mourinho instructions sha.