Five Things wey we observe as Manchester United knack Bournemouth 1-0


The Red Devils of Manchester bin knack AFC Bournemouth 1-0 for Old Trafford on Wednesday night so dem go fit bounce back to winning ways after the defeat wey dem see against City last weekend. The person wey score for the Reds na Romelu Lukaku (first half). As everything take be, Man City still dey use 11 points gap United because Guardiola’s men bin demolish Swansea 4-0. For other places, West Ham bin draw against Arsenal, while Liverpool self draw against West Brom.

We wan talk about the five things wey we observe for the game:

The first thing wey we observe na say Manchester United no play well for the match. Fashi say dem collect three points, Bournemouth worry dem. The number of chances wey Bournemouth see ehn, e yakpa but na David de Gea save dem. If no be for the Spaniard, the match for don end 1-1. Although we gats hail Phil Jones and Chris Smalling because dem also try wella for defence.

Another thing wey we observe na say Luke Shaw bin dey outstanding and na how e take win United Man of the Match self. For front, e epp for attack and for back, e bin epp with defensive duties. Na only once wey person dribble am throughout the whole game. From everything wey i don see so far, if Shaw continue like this, Jose Mourinho go get serious plans for am and e fit fashi signing Danny Rose.

Another thing wey we observe na say Scott McTominay bin impress, Nemanja Matic bin do the usual but Anthony Martial bin fall my hand. McTominay dey try, e dey hold ball well, e no dey shake and e dey hard before e lose possession. E get one chance wey e create after e play through ball give Rashford, but as Rashford give Lingard, dat one go slip. Matic bin do the usual as e block road to prevent Bournemouth from passing freedom. Martial bin dey poor, most of hin decisions bin no make sense and e just dey lose possession up and down. E even spoil some counters.


Another thing wey we observe na say Henrikh Mkhitaryan’s united career dey inside lagoon. Everybody sabi say the Armenian’s form bin drop, but this one wey Jose Mourinho don leave am out of hin side for many matches no make sense. If i be Mkhi, i go fight for my place but e no go surprise me if Mkhi hand in transfer request.

The last thing wey we observe na say the first position fit don dey decided for Premier Leaugue already as e go hard for Manchester City to drop eleven points. The koko na say, if City drop the points, shey United go fit do the job to overtake them? If i go dey honest, make United try cement second place, and carry other cup trophies. All round, we believe say we don improve this season.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s